کہندے نیں کہ جدوں انگریج ایتھوں جان لگے سن تے اوہناں نوں کسے آکھیا کہ پائی اپنی چاء تے لے جاؤ اوہ چاء تےچھڈ گئے لیکن چاہ لے گئے۔
لسی اچ اپنی اک چاہ سی جدوں ست سویرے اُٹھ کہ ماں دودھ رڑک کہ پہلاں چھڈیاں وکھریاں کر بلیاں نوں پاندی سی فئیر جواک نوں لسی دا وڈا گلاس دیندی سی تے اوہندے اچ اوہندی ممتا دی چاہ ہندی سی تے ہن شکر دوپہر سڑدے بلدے آندے پروہنے نوں ویکھ کہ تے آکھ دیندے نیں جا اوئے بوتل لے آ جیویں اوہنوں سنہیا دے رئے ہوون کہ پائی کہ اے کالا کوجا تے چینی دا ماریا پانی پی تے راہ پو اپنی تے دوجے پاسے جدوں لسی آندی سے تے آندراں تے نال نال اوہ رشتے اچ وی ٹھنڈ پاندی جاندی اے
کہندے نیں کہ لسی پی کی نیندر آ جاندی اے تے بھئ کیویں نہ آوے نیندر جدوں کوئی شے جیٹھ دی دھپ اچ تہاڈی روح تک نوں سکون دیوے تہاڈی ترسدیاں آندراں نوں انج ٹھارے جیویں ہاڑ دی سڑدی بلدی بھوئیں نوں سون دے بدل ٹھاردے نیں۔
جدوں دا پیپسی دا رواج پیا اے دن نوں کسے کیہ سونا اے رات دیاں نیندراں وی اُڈ گئیاں نیں، کولڈ ڈرنک آکھائی جان آلا اے مشروب ٹھنڈ دی تھاں کلیجے بھانبڑ انج بالدا جیویں کوئی چھیڑو پوہ دے پالے توں بچن لئی اگ دا مچو لاندا اے۔ جدوں تیکر پنجاب دے گبھرو لسی پیندے سن اوہندا دے ٹڈ اوہناں توں سوا قدم اگے نئیں سی ہندا تے نہ ہی شوگر جئی کلموئی بیماری نے سوہنی دھرتی تے ہنیر مچایا سی پر جدوں دا پیپسی ہوراں نیں پنج دریاؤں دی دھرتی تے پیر رکھیا اے ہردوجا بندہ ٹڈ تے تیجا شوگر دا مریض نظر آوے گا۔
انج پیپسی دی آمد توں بعد بیبیاں دا جیون سوکھا ضرور ہو گیا کہ کہ دودھ رڑکن توں وی جان چھڈی تے کسے آئے گئے نوں پچھن توں وی کہ جدوں کوئی موہ دا ماریا جے ایس ویری زمانے دے ویہڑا ٹپ ای آندا اے تے اوہ پلے بنے پنجا سو دا نوٹ کھڈ کہ آکھدی کہ جا پتر بوتل لے آ کہ نال برف لے آویں آدھی بوتل تے آدھی برف پا کہ سر توں بھار لا دیندیان نیں۔
لسی جیا مشروب تے دنیا اچ لبھیا نہ لبھے بھئی ویکھن اچ وی سوہنا سونکھا تے پین اچ وی اوتھوں پھوہ دے بھا، تے فیدے وکھرے۔ سب نالوں پہلاں فیدہ اے کہ بھانویں جنے مرضی بندے ہوون پانی پائی جاؤ تے لسی ودھائی جاؤ۔ انج تے لسی دے فیدہ ای فیدہ نیں پر دو چار چوندے چوندے میں دس دینا باقی تسی لبھ لینا مثلا ہڈیاں مضبوط کرن لئی کیلشیم دی تھاہ وی لسی پیو جے تہاڈا خون حد توں ودھ کھولدا اے تے فئیر وی لسی مفید اے لمی عمر دا چاء ہووے یا فئیر معدے تے تیزاب دی عمر کھڈ کرن دا اک گلاس لسی دا ۔ باقی جے تہاڈا دل اے کہ تہاڈے جگر اچ ساڑ پوے یا تہاڈے گردے چڑھدی جوانی اچ جواب دے چھڈن تے فئیر پئی پیپسی پیو جیویں پین دا حق ہندا اے۔
اوہ اک شاعر نےکیہ خوب لکھیا سی کہ دس ہور کنیا تعریفاں چائدیاں تینوں وغیرہ وغیرہ خیر مختارے دی گل بوہتی ودھ رہی لیکن لسی دے گل ہووے تے انور مسعود صاب دی مشہور زمانے نظم دا ذکر نہ ہوو نہ چن نہ انج نہیں،
تے انور صاب فرماندے نیں کہ
لَسّی چاء نُوں آکھدی اے
میں سوہنی میں گوری گوری تُوں کالی کلوَٹّی
میں نیندر دا سُکھ سنہوڑا توں جگراتے پَٹّی
جس ویلے میں چائیں چائیں چَھنّے اندرچھلکاں
کیہڑا سانبھے میریاں لِشکاں کون سنبھالے ڈھلکاں
رنگ وی میرامکّھن ورگا روپ وی میرا سُچّا
دُدھ ملائی ماں پیو میرے میرا اصلا اُچّا
جیہڑا مینوں رِڑکن بیٹھے اُس دےواری جاواں
کھڑکے ڈھول مدھانی والا میں وچ بھنگڑے پاواں
میں لوکاں دی صحت بناواں تُوں پئی صحت وگاڑیں
میں پئی ٹھنڈ کلیجے پانواں توں پئی سینے ساڑیں
Show Konversi KodeHide Konversi Kode اسمائیلیز دکھائیں۔اسمائیلیز چھُپائیں۔